For dei fleste av oss er det viktig å få bu der vi kjem ifrå. Derfor treng vi fleire fosterheimar i eigen kommune, for dei barna som ikkje kan bu hos nokon frå familien sin. «It takes a village to raise a child», er grunnforståinga i arbeidet med å ta vare på barn og unge som treng fosterheim. Vi står saman for å sikre at barn som bur i fosterheim skal oppleve ein trygg og kjærleg omsorgssituasjon.

På denne sida kan du lese om å vere fosterheim og kva støtte, oppfølging og godtgjersle du får som fosterheim i Stryn kommune.
 

Kva oppfølging får eg som fosterforelder i Stryn kommune?

Du vil få ein kontaktperson og ein rettleiar som du har regelmessig kontakt med, og som du kan kontakte ved behov. Du kan drøfte praktiske spørsmål eller ulike dilemma og problemstillingar. Teamet som blir etablert følgjer opp både barnet, foreldre, fosterheim, skulen/barnehagen og andre involverte personar.  

I starten går de gjennom ein rettleiingsprosess der vi vil bidra til at de får ein god start saman med barnet som flyttar inn. Vi pratar om relasjonen dykkar og knyter den opp mot kunnskap på aktuelle tema.

De kan få rettleiing både individuelt og i grupper saman med andre fosterheimar. Eventuelle omsorgsbehov som eigne barn har, er også eit naturleg tema.

Barneverntenesta vil leggje til rette for at dei vaksne skal samhandle med utgangspunkt i omsorgsbehovet til barnet og sikre nødvendige forsterkingstiltak for å sikre omsorgsrammene.

I fosterheimsavtalen kan du lese meir detaljert kva du får og kva du forpliktar deg til dersom du takkar ja til å bli fosterheim for eit barn.  

Vil du vite meir?  

Dersom du er litt nysgjerrig, kan du lese meir om det å bli fosterheim for eit barn i eige nærmiljø, på fosterhjem.no 

Nyttige lenkjer

• KS - satsar for fosterheim
• Fosterhjemsavtalen
• Direkte til kontaktskjema fosterhjemstjenesten