Signeringa skjedde i forkant av formannskapsmøtet 24. oktober 2024, her ser vi Per Kjøllesdal og Astrid Juklestad. Foto Roy Aron Myklebust FjordingenMålet med kampanjen Demensvennleg samfunn er å auke samfunnet sin kunnskap og bevisstheit rundt demenssjukdom og skape gode haldningar. Ved at fleire i samfunnet kan litt meir om demens, blir det lettare å leve med sjukdomen da personar med demens kan bli betre inkludert i nærmiljøet og møtt med forståing, respekt og støtte.
I dag lever over 100 000 nordmenn med ein demenssjukdom og mange av dei bur framleis heime. I åra som kjem vil stadig fleire få demens. Tal personar med demens i Stryn kommune vil nesten doblast dei neste tiåra, frå rundt 180 personar i år 2025 til om lag 330 i år 2050 demenskartet.no
Hovudsakeleg kjenneteiknast demens ved kognitiv svikt, der svikten er av ei slik grad at den påverkar evna til å fungere normalt i dagleglivet veiviserdemens.no Vanlege kvardagsaktivitetar, som å handle, bruke offentleg transport, delta i kulturaktivitetar, organisasjonsliv og nytte offentlege tilbod kan bli vanskeleg ved demens.
Det er eit behov for auka kunnskap om demens og å legge betre til rette i lokalsamfunnet, slik at personar med demens kan fortsette å delta i kvardagsaktivitetar i lokalmiljøet.
Nasjonalforeningen for folkehelsen
Nasjonalt senter for aldring og helse
Hukommelsesteam Stryn
Korleis kan du og di bedrift, din arbeidsplass, ditt lag eller di foreining bidra?
Har du ein jobb der du møter mykje folk? Då vil du også møte personar med demens. Vi ønskjer å hjelpe deg og kollegaene dine til å bli tryggare i møtet med personar med demens. Som eit ledd i arbeidet med å gjere Stryn kommune meir demensvennleg, tilbyr Stryn kommune kurs for tilsette i offentleg og privat servicenæring/bedrifter. Kurset gir deg blant anna kunnskap om demens, kva utfordingar personar med demens kan ha i kvardagen og kva bedrifta og den enkelte kan bidra med.
Kvifor kurs om demensvennleg samfunn?
Auka kunnskap om demens blant tilsette i servicenæringa kan føre til at personar med demens blir tryggare og lettare kan klare å utføre vanlege kvardagsaktivitetar, som å handle, bruke offentleg transport , delta i kulturaktivitetar og foreningsliv
Auka kunnskap kan føre til at personar med demens blir tryggare og dermed kan oppretthalde eit aktivt liv
Med auka kunnskap om korleis du bør møte personar med demens, både i jobbsamanheng og privat, kan utfordringar i din arbeidsdag blir enklare å meistre
Varigheit: 1,5 -2 timar
Når/kvar: Arbeidsgruppa held kurs for di bedrift/organisasjon etter avtale
Kostnad: Kurset er gratis
Bevis: Alle deltakarane får kursbevis
Demensvennlege bedrifter/servicenæring
Når minst 50% av bedrifta sine tilsette har gjennomført kurset, mottek bedrifta eit klistremerke som viser at de har kunnskap om god service for personar med demens. Eit godt synleg klistremerke kan vere eit konkurransefortrinn for bedrifta.