Eigenberedskap med Hans Olav Bøe 9. april på biblioteket

I foredraget Eigenberedskap vil Bøe gi konkrete og lett gjennomførlege råd om brannsikkerheit, eigenberedskap, og kva du kan gjere for å stå tryggare dersom uventa hendingar oppstår. Han deler praktiske tips om kva du bør ha heime, kva som er lurt å tenkje gjennom, og korleis små førebuingar kan ha stor betydning når situasjonen krev det.

Som representant for Stryn kommune vil Bøe også løfte blikket og snakke om kvifor eigenberedskap er viktig i eit samfunnsperspektiv, og kva rolle kommunen har ved kriser – frå førebygging og beredskapsplanlegging til varsling og koordinering når noko skjer.

Arrangementet er ein del av Stryn bibliotek sitt ekstra fokus på beredskap i Totalforsvarsåret 2026. I ei tid der tryggleik og robustheit står sentralt, ønskjer Stryn bibliotek og Stryn kommune å bidra med kunnskap som styrkar innbyggjarane sin tryggleik i kvardagen.

Foredraget er ope for alle, og passar for alle som ønskjer å lære meir om korleis dei kan gjere heimen sin tryggare – både for seg sjølv og dei rundt seg.

Velkomen til ein lærerik og samfunnsnyttig kveld på Stryn bibliotek!