Strakstiltak for Panoramavegen

Kommunedirektøren Jon B. Nesje i Stryn kommune hasteinnkalla til møte tysdag i førre veke for å få på plass strakstiltak for å ivareta innbyggjarane på Nordsida og sikre betre gjesteoppleving. 

Fleire innbyggjarar på Nordsida, samt Nordsida utviklingslag, har teke kontakt med Stryn kommune om konkrete problemstillingar knytt til aukande turisttrafikk på Panoramavegen. Det er spesielt grunngjeve med aukande tal bussar og turistar frå cruisebåtar som vitjar Nordfjordeid og Olden. Ordførar Per Kjøllesdal seier at det er viktig at vi tek innspela på alvor og at det er mogleg å finne løysingar gjennom felles forståing og dialog.

Etter forutgåande dialog med aktørane, inviterte leiinga i Stryn kommune hamnene og cruiseaktørar til møte tysdag førre veke for å finne strakstiltak knytt til Panoramavegen. Enkelte dagar er det høg busstrafikk i begge retningar som fører til dårleg framkomst og farlege trafikksituasjonar. Det er forståeleg at dette skaper irritasjon for innbyggjarane. Formålet med møtet var å sikre at det skal vere trygt å ferdast denne vegen både for gåande, syklande og køyrande. 

Dei frammøtte er samde om å gjennomføre nokre strakstiltak på kort sikt for å løyse utfordringane denne sesongen. Det er særleg 5-6 dagar fram mot hausten ein bør redusere trafikken og finne andre alternativ til utflukter. Samstundes skal ein utarbeide ei køyrebeskriving som skal koordinere busstrafikken med omsyn til tid, avstand, retning og stopp på utsiktspunkta. 

Ordførar Per Kjøllesdal seier han er glad for at aktørane er løysingsorientert og hjelpsame. Det er skal vere fint å besøkje Stryn og samstundes skal det vere trygt og godt å vere innbyggjar. Vidare poengterer han at det er viktig å sjå dette som ei lokal moglegheit til å utvikle verdiskapande aktivitetar på sikt.