Når kan eg brenne bål?

Den enkelte står ansvarleg for bålbrenninga. Skal du brenne eit større bål, meld gjerne frå 2-3 dagar før på epost: postmottak@stryn.kommune.no
Hugs at epost ikkje blir lesen i helga.

Ved store bål meld frå på førehand til brannvakta tlf 917 21 631.

Mellom 15. april og 15. september er det forbode å gjere opp eld nær skog og i all anna utmark utan løyve frå kommunen. Då er faren for å forårsake gras- og skogbrannar større enn elles i året. Det er likevel lov å gjere opp eld der det absolutt ikkje kan medføre brann.

I perioden 16. september til 14. april er faren for å forårsake gras- og skogbrannar normalt ikkje så stor. Då er det igjen lov å gjere opp små bål ute i naturen, uten å spørje brannvesenet.
 

I Stryn kommune er det lov med:

• Open brenning på grillinnretningar, utepeisar og kaffibål
• Brenning av avfallstrevirke, med unntak av rivingsavfall og impregnert og måla trevirke
• Brenning av Jonsokbål og Olsokbål
• Ranke- og flatebrenning i landbruket i god avstand til tettbygde strok
• Kulturarrangement med vardebrenning eller liknande
• Brenning av tørt hageavfall i god avstand til tettbygde strok
   

Kva skal du passe på når du brenner bål?

Ved all brenning må du vere forsiktig. Dette gjeld særleg i tørkeperiodar og periodar med sterk vind. § 3 i forskrifta seier at det er generelle krav til aktsomheit. Kvar enkelt person pliktar å vise aktsomheit ved gjennomføring av aktivitet som kan føre til brann. Det er forbode å gjere opp eld eller behandle brannfarlege gjenstander utandørs under slike forhold, eller på en slik måte, at det kan føre til brann. 

Her er nokre retningsliner:

• Sørg for god avstand til bygningar, vegetasjon og anna brennbart materiale
• Hald bålet under oppsyn og kontroll
• Sørg for at barn held god avstand til bålet og at dei ikkje er kledd i lettantenneleg tøy
• Slokk alltid bålet forsvarleg med rikeleg mengder vatn. Finst det ikkje vatn på staden, må du ta med.

• Hugs at all bålbrenning skjer på eige ansvar

• Ver svært varsom med bruk av eingangsgrill. Den er ofte grunnen til gras- og skogbrannar. Plasser aldri eingangsgrillen på brennbart underlag og slokk den heilt etter bruk.

Stryn kommunestyre vedtok 18. desember 2014 forskrift om open brenning og brenning av avfall i småomnar med heimel i lov 13. mars 1981 nr. 6 om vern mot forurensninger og om avfall (forurensningsloven) § 9, jf. delegeringsvedtak 19. juli 2001 nr. 1706.

Les forskrift for Stryn kommune om open brenning og brenning i småomnar