Ungdommens kulturstipend 2023 til Gjertlin Elidotter Kirkeeide.
Ingrid Heieren Sølvberg
Gjertlin Elidotter Kirkeeide har, heilt sidan ho var lita, delteke på ulike teateroppsetjingar. På barneskulen fekk dei jobbe kreativt med dramatisering og å utforske det å stå på scena, saman med lærar Bjørg Jorunn Vinsrygg Steen. Då kulturskulen fekk teater som undervisningsfag var Gjertlin rask å bli med, i tillegg til teatergruppe gjennom Flo Aktiv. I 9. klasse var ho ei heil veke på Riksteatret i Oslo, under hospiteringsveka.
I to år har Gjertlin vore på scena i oppsetjinga «Ull innerst i sjela», historia om den 130 år gamle ullvarefabrikken i Innvik. I 2023 var ho med på det historiske spelet «Elskhug og eksis» på Nordfjordeid
Gjertlin er 19 år, har gått tre år på dramalinja ved Firda vgs og går no på Romerike Folkehøgskole på Jessheim, slik ho lenge har drøymt om. For den vidare draumen er å bli profesjonell skodespelar. Gjertlin er hardtarbeidande og set seg klare mål som ho jobbar mot. Sjølv om den største draumen er å ta utdanning i England innan film-skodespel, håpar vi verkeleg vi får sjå ho på ei scene nær oss i framtida også.
Som Gjertlin sjølv seier det så fint:
«Eg MÅ bli skodespelar. (...) Det er ei uvurderleg kjensle. Eg kjenner meg -fri.»
– Vi gler oss til å følgje med på deg i framtida, og det er med ei stor glede vi gjev deg Stryn kommune sitt Ungdommens kulturstipend for 2023, seier leiar i utval for samfunnsutvikling, Arnljot Sæternes.
Ungdommens kulturstipend er på kr 20 000, samt eit diplom.
Ungdommens kulturstipend 2023 til Gjertlin Elidotter Kirkeeide. Frå venstre leiar i utval for samfunnsutvikling, Arnljot Sæternes, prisvinnar Gjertlin Elidotter Kirkeeide og avdelingsleiar for kultur Ingrid Heieren Sølvberg.
Foto: Sigrid Heggestad, Fjordingen